Piansualna in a hneh theih loh
NICK VUJICIC

        Khawvela mihring piang chhuak tam ber te hi fuke kim leh taksa a harsatna neisa lemlo a piang chhuak kan ni awm e. Chutih rual chuan khawvelah hian fuke kim lo, pianphunga rualbanlo sa leh natna khirhkhan tak tak in a tlak buak sa a khawvel eng rawn hmu pawh tam tak an awm ve bawk a. Fuke kima piangchhuak tam tak hian Pathian malsawmna a ni tiin Pathian hnena lawmthu sawina chang kan hrelo fo. Chutih lain harsatna tamtak leh rualbanlo sa a lo piangchhuakte hian Pathian hi an hmu chiangin harsatna an tawh te chu a hmel mawi hmuh tirtu a ni fo thin. Tun tum Thalai Huangah hian harsatna namen lo tawk chunga a harsatna tawh inhneh tir duh lotu leh Pathian rawngbawltu nichho ta kut leh ke neilo NICK VUJICIC-a (Nik Vuuichik ti a lam tur) chanchin hi i han chhuizau ve thung teh ang.
        Pian leh murna: Kum 1982 December Ni 4 a lo herchhuah chuan Australia ram a Brisbane khawpuia cheng Pastor Bruce Vujicic-a leh a nupui Nurse hnathawk Dushka Vujicic-i te chuan an nghahhlelh em em  mai, harsatna awm miah lo a thla kaw chhung  nu ber in a lo pai tawh an fa piang tur chu nu ber chuan vei mek a, chutia nghakhlel tak a Pastor Bruce an an nu nauvei a dawm lai chuan beisei loh tak mai in an nu chuan naute kut pawh nei lo, ke pawh nei mumal lo chu a hring chhuak ta mai le. Chu naupiang rapthlak tak avang chuan Pastor Bruce chu Bathroom lamah luak turin a tlan lut hial a, a nupui Dushka Vujicic phei chuan thla li anih thlengin a pawm ngam lo bawk. Chutiang tak a Nick Vujicic-a an rap em em na chhan chu natna vang tak  Tetra-amelia in a a thlen piansualna, ban bul leh ke te tak te nen chauh a a lo pian chhuah vang chu a ni.
        Pan lai nun: Hetiang a rualbanlo sa a piang hi nimahse la Nick Vujicic chu naupang hrisel tak a ni a, nimahsela a piansualna chuan a nun ah hrehawmna leh harsatna tam tak a thlen thin, chung zinga pakhat chu School a luh dawnin an awmna Victoria state in a dan a hman laiah chuan pianphunga rualbanlo te tan mipangngai te luhna school a luh ve a rem lova, rualbanlote tan school hran abika dinah chuan luh t ur a ni. Nick pawh chu mi pangngai school a lut thei lovin rualbanlote school a luh tir tum a ni a, mahse a nu chuan Nick chu pianphungah rualbanlo mahse a rilru chu a pangngai em em bakah naupang bright tak leh rilru chak tak a ni tih a hre chiang em em a, rualbanlo mai pawh ni lo rilru kimlo te tana sikul Sorkarin a siamsak a a fapa rilru pangngai tak han kal tir chu a remtih loh bakah a fapa tan tha dawn a a hriat loh avangin theihtawpin a fapa tan hma a la a, sawrkar thuneitu te leh Sikul lam thuneitu hrang hrangte hmu kualin theihtawpa a beih hnuah a fapa chu sikul pangngaiah a luh tir thei ta a, naupang thiam thei tak niin Victoria State Premier pawhin a hranpa ngata tlawhin amah avang hian naupang rualbanlo te chunga khawtlang rilru put dan pawh nasa takin a danglam phah a ni.
        Beidawnna atanga Beiseina : Nick hian a school luhna ah hian harsatna tam tak a tawk chhunzawm a, naupang dang ten an tiduhdahin a piansualna avangin an chhaih nawmnah a a rilru a hrehawm hle thin. Mahse chung hunah te chuan Kristian chhungkua atanga seilian a nih angin a rilruah Bible chang Sam 139 :17 - 18   ‘Aw Pathian, i mi ngaihtuahnate chu ka tan a va hlu em; Chhiar sen rual a ni lo. Chhiar dawn ila, tiau vaivut aia tam a ni, Ka han harh chuan i kiangah ka lo awm reng a ni,’ tih hi lo awmin chu thu chuan a thlamuan fo thu a sawi. Hetianga tihduhdahna leh hmuhsitna a tawn te avang hian beidawnna leh thinrimna nasa tak a nei thin a. Kum 8 mi a nih in mahni inthah a tum a, a hlawhchham a. Kum 10 mi a nihin tuiah inhnim hlum a tum leh a, mahse a nu leh pa amah hmangaih em em tu te a ngaihtuahin a thulh leh a ni. Pathian hnenah vawi tam tak a ban leh a ke te to tir tura a dil hnuin Nick Vujicic chuan a thiam thil leh a theihna te, midang anga nung thei tur a theih tawpa a beihna te chu midang tan chona nasa tak siam sak tu leh mi thinlung a nasa taka thusawitu a ni tih a hre chhuak a, a nunna chelhsaktu Pathian hnenah lawmthu a hrilh mawlh mawlh ta zawk a ni.
        Hetianga nun khawhar leh beidawng taka a hman lai hian nikhat chu a nu in chanchinbu a mi pakhat piansualna hrang hrangin a tlakbuak chanchin inziak chu a chhiar tir a, he thuziak hi a nun nasa taka thlakthleng chhotu a lo ni ta in Nick-a chuan amah chauh chu chutiang harsatna leh beidawnna tawk a ni lo tih a hrechhuak a, chu chuan tumruhna pek belhchhahin thil tam zawk tih theih tumin nasa takin hma a lak phah ta a, chung a beidawnna hrang hrang a tawn te chuan hneh tum tlatin a thinlungah tumruhna leh tuarchhelna a siamsak tuah a hmang zawk a, tichuan a tumruhna leh a tuarchhelnaa vangin a ke veilama a ke zungtang pahnih hmangin a ziak thei a, Computer mouse leh keyboard te a ke hmangin duh tawkin a hmang thei a, Tennis ball te vawm theiin Drumset te a ke hmangin a vaw thei a, a ke hmang vekin a sam te khuih theiin a ha te a nawt a, phone te hmang theiin a bak hmul te a inziah fai sak theih bakah tui te pawh duh tawkin a in thei a ni. Ni khat chu Sunday School a a zirlaiin a rilru a khawih em em a, chuta tang chuan a rinna chu Isua Kristaah nghatin midangtana malsawmna ni thei turin a hringnun chanchin te midang a hrilh thin a. A chanchin midang a hrilh thinin midang nuna thu a sawi nasat zia leh an nuna harsatna  hrang hrang an tawha tuarchhelna leh tumruhna petu a nih thin thu a hriat chuan amahah Pathianin thil tum a nei tih a man chho ta a, a piansualna leh rual a ban lohna te chu Pathianin midangte cho chhuaktu atana hmanruaa hman a duh tih a hriat in a vawikhatna atan a chunga thil thleng zawng zawng chu Pathian malsawmnaah a pawm thei ta a ni.
        Pawl sarih a nih in an Class Captain atan thlan a ni a, kum sawmpasarih a lo tlin chuan Tawngtai pawl a dinah thusawi tanin hlawkna umlova midang tan a rawngbawlsaktu pawl ‘Life Without Limbs’ chu a din chho ta a ni. Kum 21 a nihin Subject pahnih Accounting leh Financial Planning te major subject a la in a graduate a, chumi hnu atang chuan motivational speaker(mite fuih leh chophur zawnga thusawi tu) niin tunlai thalaite thil tawn hrang hrang leh a nun behchhanin hmun hrang hrangah thusawiin a zinkual thin a. Khawvel pum huap a thusawi hmang a mite fuih thara chophurtu nih tumin Kristian intawhkhawmna, sikul, leh pawl ho intawhkhawmnaah te thu sawin vawiin ni thleng hian khawmualpui panga a ram hrang hrang 24 a cheng mihring maktaduai 3 chuang hmaah thusawi tawh ni a chhut a ni. Heng bakah hian khawvel huapa show lar ber pawl Oprah Winfrey Show ah te a inlan a, tin, kum 2005 khan  a nitin nundan leh mi pangngaiin a thil an tih thin hrang hrang te kut leh ke pangngai tello a a tih thin dan chu film a siamin mi dangte fuihnan ‘Life’s Greater Purpose’ DVD chu a tichhuak a, thalaite leh naupang zawkte tan a en turin a nun behchhana harsatna hrang hrang a paltlang dan tar lanna ‘No Arms, No Legs, No Worries: Youth Version’ chu a tichhuak leh bawk a ni. 
        Hetiang taka abeihna leh midangte tana malsawmna nih tum a abeih avang hian kum 2005 khan Nick Vujicic chu ‘Young Australian of the Year’ Award hlan a ni a. Tin, short film pakhat ‘The Butterfly Circus’ tih a ah a inlan a Will-a lemah a chang a ni. He film hian Doorpost Film Project lawmman sang ber chu kum 2009 khan a dawng a, he film avang bawk hian Method Fest Film Festival ah Best Short Film Award a dawn bakah NIcj Vujicic hian Best Actor in a short Film Award a dawng bawk a ni. Hei bakah hian nikum 2010 khan Hollywood a sem Feel Good Film Festival ah he film vek hian Best Short Film  Award a dawng bawk a ni. Tunah hian  Nick Vujicic hi California ah a cheng mek a, a pawl din ‘Life Without Limbs’ ah theih tawpa inhmangin midangte tan thuchah ropui tak tak puangchhuakin hun a hmang mek a ni.
        Nick Vujicic hian midang te fuihtu leh beidawngte tana beiseina kawng kawhhmuhtu nih a tumna chu a hringnun kawng chhukchho tak atanga a thintawn midangte hnena sawi atangin a ti hlawhtling a, mi maktaduai chuang hnenah chona leh fuihna thu tha tak tak a hrilh a ni. Nick Vujicic hian ka thil thlir dan te bihchiang turin min ngen a, harsatna kan tawh hrang hrangte thlir kan a chung harsatna kan tawhte chu remchanga la a hmasawnnan leh tisa leh thlarau a than lenna atan hmang turin min fuih a ni

Thalai huang

Khawvela Billionaire Naupang ber

Mark Zukerberg leh Facebook

 -Gilbert Renthlei

Chhuak hmasa lamah Khawvel nghawr nghing khawp a chanchin ngah Wikileaks chanchin kan chhui tawh a, tun tumah erawh chuan Mizo kristian thalai ten tunlai khawvel thil lar pakhat bengvar nan han chhui leh dawn ila. Khawvelah hian thil tam tak ngaihnawm leh nawm lem lo te a thleng reng a, hmasawnna hrang hrangin min deng reng bawk a, heng thil thleng te hi a tha lam emaw a chhe lam emaw kan hriat a Kristian thalai te kan khaw hawi a zau leh zual theih nan tun tum Thalai huang ah chuan tunlai a lar em em mai khawvel hmun  hrang hranga mi te Computer leh internet hmanga mahni dawhkan atanga khawvel lehlam ami te inkawm nana hman lar Facebook leh a siamchhuaktu, khawvela Billionaire naupang ber Mark Zukerberg-a chanchin I han chhui dawn teh ang.

                Tunge Mark Zukerberg chu? :- Mark Elliot Zukerberg hi Edward leh Karen te inkarah kum 1984, May 14 khan White Plains, New York ah a lo piang a, unau pianpui pathum neiin chungte chu Randi, Donna leh Ariele te an ni. White Plains ah piang mahse an naupan lai hun tam zawk chu Dobbs Ferry , New York ah an hmang a, amah hi Jewish chhungkua atanga seilian a ni. Zirna lamah a rual pawl tawk tak niin Ardsley High School-a a kallai te chuan Greek leh Latin Philosophy lam a tuipuiin a thiam thei hle a  College a kal lai phei chuan Homer-a kutchhuak hla hril ‘The Iliad’ a sawi thiam em avangin a lar thin hle a, chubakah Phillips Exeter Academy-a a insawn hnu phei chuan Maths, Astronomy leh Physics ah te lawman a dawng ziah thin a ni. Mark hian College a kal lain tun thlenga a bialnu ni ta Chinese mi Priscilla Chan nen hian an inchhar a, Priscila Chan hi Doctor zirlai niin amah avang hian Mark hian Chinese ho tawng Mandarin a zir phah nghe nghe a ni.

                Mark Zukerberg hian middle school a kallai atang tawhin Computer hi a lo hmelhriat tawh a. A  pa hian helam kawng a kal tur hian a fapa hia duhsak hle a, Software siam thin David Newman-a chu Mark-a computer zirtir tur hian kum 1990 chho khan a rawihsak thin a ni. Heng hunlai pawh hian Mark-a hi amah zirtir tu David  Newman chuan thiam thei a ti hle a, ‘naupang thiamna bik talent special nei’ a ti hial a ni. A rilru a chak hle a, High School a kal lain an in bul lawk a awm Mercy College ah chuan Graduate Course a zir pah bawk a ni. Computer Programs duan te leh games siam lam te a tui hle thin a, chung zinga pakhat chu a pa hi ha siam (dentist) a ni a, Software pakhat ‘Zucknet’ tih chu aman siam chhuakin a pa dawr leh an in inkar a computer a file hrang hrang in lak pawh nan a hmang a ni. He ‘Zucknet’ hi a kum leh a lo chhuak AOL Instant Mesenger lo chhuahna bulpui niin sawi a ni bawk. High School a kal lai vek hian Mark hian Intelligent Media Group hnuaiah rimawi ngaihthlakna hmanrua pakhat Synapse Media Player a siamchhuak a, he a thil siamchhuah hi IT company lar Microsoft leh AOL ten an lo hriatin  Synapse hi lei sak a Mark Zukerberg hi an hnuaia thawh tir tumin an sawm a, mahse Mark Zukerberg chuan he sawmna hi hawlin Havard University-ah zirna sang zawk bei turin kum 2002 September khan a inziak lut ta zawk a ni.

                Havard University-a a luh tirh atang hian Mark Zukerberg hi Programming lam a mithiam niin hriat a hlawh sa hle a. Computer Science leh Psychology chu a subject a ni. Havard-a a kum hnih zir kum chuan Computer program thar zirlaite hlawkpui tak tur ‘Coursematch’ chu a duang chhuak a, hemi hnu lawk hian programe dang intihhlimna atan siamin a hmingah ‘Facemash’ tih a vuah a. He Facemash hi a lar em avang leh zirlaiten an zirlai aia an buaipui nasat avangin University thuneitu ten an tih tawp sak ta hial a ni. He thil tihtawp a nih hnu hian university zirlaite chuan Zirlaite thlalak leh an chanchin tawi tarlanna website siam turin University thuneitute an ngen a, hei hi Mark-a’n a lo hriat chuan ‘University hian an siam lo anih pawhin keiman University siam aia tha zawkin ka siam ngei ang’ tiin thu a lo ti tlu a ni.

Enge Facebook ve thung chu le? :-  October 28, 2003 it intihhlimna mai mai atana Mark Zukerberg-a’n Facemash a siam University hruaitu ten an tihtawp sak hnu khan Mark Zukerberg chuan hma la leh nghal in kum 2004 khan a thiate pathum Eduardo Saverin, Dustin Moskovitz leh Chris Hughes te nen tang hovin TheFacebook.com chu a duangchhuak leh ta a. A tirah chuan Havard University chhung chauh a hman tura duan a ni. Mahse a hnu zelah Facebook chu lo darh zau zelin Boston a College hrang hrangah te, Staford, Dartmouth, Columbia, New York, Cornell, Brown leh Yale University ah te  hman a ni chho a. Hetih lai mek hian Havard University a amah aia senior Cameron Winklevoss, Tyler Winklevoss leh Divya Narendra te chuan Mark Zukerberg chu Havardconnection.com siam an tumna a puiturin an sawm a, mahse Mark chuan chu Website simna tur a an idea ru chhuak a Thefacebook.com  siam nana hmangah puhin kum 2004 khan thubuai an thehlut a, chu thubuai chu June 25, 2008 khna remfel niin Facebook chuan $20 million an pe ve ta a ni. A hnuah Mark Zukerberg leh a thiante chu Palo Alto, California ah insawnin Office atan kum 2004 laihawl vel khan in te reuh te an luah ve tan ta a ni. Facebook hi Company hlun leh lar Yahoo, Friendster, Viacom etc ten lei tum in an lo bei tawh thin a mahse an hlawhchham rih zel a. tuna Facebook hlutna hi $ 41 Billion vel ni a chhut niin Mark-a thianpa Napster dinchhuaktu Sean Parker an a hmelhriattir Paypal dintu Peter Thiel chu investor hmasa ber niin 2005 khan Facebook ah hian $500,000 a invest a, heta tang hian $200,000 a domain leiin ‘The’ tih chu paih in an hming atan facebook.com tiin an thlak ta a ni.

Duanchhuah a nih atanga vawiin ni thleng hian khawvel pumah mi maktaduai 500 chuang fe in Facebook hi an hmang mek a. Vawiin ni ah chuan Facebook hi Internet website lun ber leh thlalak awm tamna ber( thlalak Billion 1.4) a ni. Facebook ah hian mimalin mahni pualin hmun(profile) a siam theih a, amaherawhchu profile siam tu tur chu kum 13 a tlin a ngai a, chumi profile hmang chuan thian dang te sawm khawmin thu in thawn nan te leh inkawm nan te a hman theih a ni. Mimal pual a Profile siam ah chuan thlalak te, video te dah luh theih a ni a, mimal tan chauh nilo in pawl ang te pawh in group profile hi siam theih a ni. Hei bakah hian Facebook-ah hian online game chi hrang  hrang Mafia Wars, Farmville, Yoville,etc khelh tur tam tak a awm bawk a, hengbakah hian thil tih theih dang (applications) tam tak a la awm bawk a, mahse chungte chu kan sawi vek seng awm love.

Mizoramah pawh heng kan sawi tak internet hmanga thian siamna leh inkawmna (Social Networking Sites) hrang hrang te hi kan hmang nasa in kan hmelhriat tawh hle a. Facebook ah pawh hian Mizo thalai mahni a Profile nei hi 5,000 chuang kan awm tawh awm e. Kan sawi tak Facebook mai bakah hian MIRC, Orkut, Twitter, Hi5, Myspace, Friendster etc leh mobile phones hmang tu te zinga lar em em thin Frenzo te thlengin Mizo thlaite nitin ti ti leh buaipui pakhat a tling mek a. Thenkhatin lehkha zir thei loh phahin tlaivar dawn dawn a thian lo kawm(online) te an awm a, inkawm satliah mai lo a lo ‘CK’  tawk lah bo lo, hmang thiam lo leh chhiatpui fe fe hi chu kan awm a ni. Khawvel hmasawnna rualin ke kan pen ve thei tawh a, internet hmangin khawvel leh liam ami te nen kan inhmu tawnin kan inbe pawh zung zung thei hi hmasawnna pakhat chu a ni ve hrim hrim mai. Amaherawhchu heng hmasawnna te hi kan hmanthiam loh chuan kan nun tichhetu, hun khawhralna satliah leh sum leh rilru senna ho tak a ni thei a ni. Heng kan sawi tak te hi awlsamte a addict theih a ni a, hmansual(abuse) pawh awlsam tak a ni. ‘Purpose Driven Life’ tih ziaktu Pastor lar ber te zinga mi Rev Dr Rick Warren te chuan midang counseling neih pui nan leh harsatna hrang hrang midangte’n an share theih turin Twitter a hmang tangkai a, a hlawhtling hle. Hetiang ang bawk a Facebook rawngbawlna atana hmang tangkai hi Mizo milar te zingah pawh an awm nual mai. Khawvel thiamna sang zelin I dawhkanah hmasawnna hrang hrang a rawn chhawp chhuahsak che in a rawn chhawpchhuak zel dawn. Heng namen lova hmasawnna mi tam takin tangkai taka an hman hi i lo chhiatpui dawn bik em ni?

Thalai Huang

WIKILEAKS leh JULIAN ASSANGE

Tunlai khawvel chanchinthar a kan hmuh ve ziah thin chu WIKILEAKS hi a ni awm e. He thil US Sawrkar thuruk meuh puangdarh a tibuai theitu Wikileaks hi lar viau mahse Mizo thalai tamzawk te chuan enge a nih a engvanga lar em em nge a nih kan hre fumfe awm lo e. Makedonia chhiar thin te hian in hriat loh hi ka duh lo e. Tun tum Thalai huangah hian Wikileaks chungchang hi theih ang tawk tawkin I han chhui chiang dawn teh ang.

                    Wikileaks hi hlawkna um lemlo a pawldin a ni a, internet-ah website siamin, chumi hmang chuan ram, pawl leh mimal hrang hrang thuruk te mipui mimir hmuh theih a phochhuaktu lar tak an ni a. An website hi 2006 atanga The Sunshine Press in an phochhuah niin Oct 4, 2006 ah registered a ni. Wikileaks website siamchhuak tu chiah leh a thluak bur ber hi tunge anih hriat anilo a, amaherawhchu Taiwan, Europe, Australia, South Africa leh US ram atanga China sorkar dodaltu leh chanchinbumi thenkhat, mathematicians leh technology lama mi thiam tak tak te inzawmkhawmin a an din ni a ngaih a ni. January 2007 atangin tuna Wikileaks hotu ber Julian Assange leh a ho te hian mawhphurhna an la chho tan ta a, Assange chuan amah chu Wikileaks Advisory Board a member mai anih thu  a puang a, chutih lain ‘The Australian’ chanchinbu chuan Wikileaks dintu anih thu an sawi thung. Hetih rual hian Wired magazine in an interview pui pakhat Wikileaks a volunteer chuan Julian Assange hian Wikileaks dintu, thluakbur, aiawhtu, sum chevel khawihtu leh engkim a engkim anih thu a sawi niin an chhuah thung. June 2009 thleng khan Wikileaks hian Volunteer in register mi 1200 chuang a nei hman a, Advisory Board Member 8 an neih thu an puang bawk. Chutih lain an website a board member ni a an chhal thenkhat te chuan Wikileaks nen a in zawmna an neih lo thu an puang zui a ni.

                    Wikileaks hian a thil tum bulpui leh hmasa ber chu ‘Asia ram thenkhat Soviet bloc, Sub-Saharan Africa leh Middle East-a mipuite zalenna rahbehsak an nih dan puandarh leh chutiang tih chiang sawrkar leh pawl hrang hrangte chetdan thuruk puandarh hna thawh’ niin an sawi a, chutiang thuruk awmna lehkha pawimawh tlangzarh tur chu maktaduai 1.2 chuang January 2007 khan an nei hman a ni. Wikileaks hian thuruk tam tak kaltlang tirna point pawimawh tak mai Tor Network kaltlang Server an nei a, chumi hmang chuan China rama an hacker ten ramdang sawrkar thuruk te lo lachhawngin ram hrang hrang 13 chuang te thuruk pawimawh maktaduai chuang an lakkhawm theih phah ta a ni. Heng zinga tlemte chauh hi Wikileaks ah hian tlangzarh a ni a, thuruk pawimawh leh ngaihnawm tam tak kum 2011 hian tlangzarh leh an tum thu Julian Assange chuan a puang bawk. Wikileaks hian Guantanamo Bay a US sipaite chetdan te, US Presidential campaign laia Sarah Palin-I Yahoo Account te, Swiss Bank a thildik lo tih chungchangte, 2008 Peru Oil Scandal te, Iranian Natanz nuclear facility a Nuclear accident thleng chungchang te, Kauptthing Bank lehkha pawimawh te leh ram hrang hranga US Embassy Cables chungchang te leh lehkha pawimawh dang khawvel nghawrnghing thei khawp tam tak an tlangzarh a ni. Wikileaks ah hian hnathawk mi 800 chuang an awm a, heng mi te hian hlawh nei lovin volunteer in mahni remchanna hmun hmun ah internet kaltlangin an thawk a ni. Kum khata an sum hmanral hi Euro 200,000 vel ani a, a hnathawkte hian hlawh neisela chu an senso hi Euro 600,000 chuang atlin rin a ni. Heng an sum hman te hi an website hmanga an khawn khawm donations atanga an hmuh a ni. Donation atang hian kumtin Euro 900,000 chuang an huilut tih Wikileaks sum chevel buaipuitu Wau Holland Foundation chuan an sawi a, heng bakah hian sum leh paia puitu dang tam tak leh danhremi rawihna thlenga puitu thahnem tak an awm bawk a, Dec, 2010 atang khan Julian Assange leh a nghet a thawk mi pali te chuan hlawh an dawng ve tan ta a.Wikileaks chanchin hi sei tak ziah tur a awm a amaherawh chu kan hmun neih in a daih loh avangin duh tawk mai ang.

Tunge Julian Assange? : Julian Assange hi July 3, 1971 khan Townsville, Queensland Australia ah a lo piang a, a nu leh pa te hi a pian hlimah inthen in a nu  hian pasal dang pahnih a neihpui a. hmun hrang hranga an pemkual thin avangin zirna in pawh a sawn ngun hle, zir tha hlei thei lo mahse Computer lam erawh a man hle thung a. Kum 1987 khan kum 16 mi niin Assange chuan hming lem ‘Mendax’ tih hmingpuin  mi computer khawih buai (hacking) a tan a. A thian pahnih te nen hacking group ‘International Subversives’ an din a, mi computer te khawih buaiin midang computer chhunga thil pawimawh thenkhatte an ru chhuak ta thin a ni. Kum 1991 khan Australian University, Canadian Telecommunication Company pakhat Nortel, Pentagon-a USAF 7^th Command Group leh pawl hrang hrang Computer hack(khawihbuai) a puh anih avangin Australian Federal Police te chuan Melbourne-a a in an dap sak a, kum 1992 a lo herchhuah meuh chuan mi computer khawihbuai avangin thubuai 24 zet a awrh hman  a ni. Vanneihthlak takin kum 10 chuang tang tur kha thutiam ziah tirin leh Aus $ 2100 chawitirin a nungchang that avangin bailed in chhuah a ni a, 1993 ah Australia rama internet service provider hmasa ber Suburbia Public Access Network a dinpui a, 1994 ah Melbourne ah khawsa in computer software a thlawna duang chhuakin  a siamchhuah hna a thawhzawm ta ani. Software hrang hrang siam chhuakin Computer software chungchang lehkhabu hrang hrang a ziak bawk a, tlaikhaw hnuah University of Melbourne ah Physics leh Mathematics a  zir chhunzawm a, Philosophy leh Neuroscience subject pawh a zir tel bawk a ni.

                    Julian Assange hian Wikileaks hi kum 2006 khan a din a, Wikileaks hmang hian Kenya ramin dan lo a mi a thah chiam chungchang te, Scientology Kohhran ho thuruk te, US in firfiak pawl a man khawm te a tan tirna Guantanamo Bay inrelbawl dan te leh lehkha pawimawh hrang hrangte mipui mimir chhiar theih turin a tlangzarh a. Tun kum tir atang khan rah rang hrang thuruk leh Iraq leh Afghanistan indona a US sawrkar inrawlh dan kimchang te a tlangzarh a. November 28 2010 khan Wikileaks larpui tak hluai US Diplomatic Cables chu a tlangzarh leh a ni. Heng a thil tlangzarh te avng hian ram hrang hrang te chuan an haw hle a, man a tan ina khung a a ka hupbeh sak an duh a ni. A bik takin US sawrkar phei chuan Wikileaks in sum an hmuhna Paypal, Visa leh Master Card hmanga Wikileaks account khawihchet theihloh a siam tumin hma nasa takin an la nghe nghe a ni. Interpol pawhin an Assange hi Wanted List ah an telh hial a ni. Hetih rual hian Wikileaks hotupa Julian Assange hi hmeichhe pahnih pawngsual a puh anih avangin Sweeden sawrkar chuan thubuai an awrh tir a, Sweeden sawrkarin European Arrest Warrant an siam hmangin Metropolitan Police te chuan London ah  Dec 7, 2010 khan an man a, Dec 16, 2010 khan London High Court chuan British Pound 200,000 a bail in a chhuah leh a ni.

                    Hetianga nasa tak a beih anih lai hian Assage hian tantu  leh faktu tam tak  a nei a, Brazil President Luiz Inaco Lula da Silva chuan  Assange man a ni chu awmlo a ti in mahni ngaihdan sawi thei tura zalenna (freedom of expression) rahbehna a ni tih a sawi a. Vladimir Putin, Russia Prime Minister hlui pawhin Mipui Rorelna sawrkar hnuai a thil thleng awm lo tak ani tiin a sawi. Hetih rual hian Ecuador Deputy Foreign Minister Kintto Lucas chuan ‘Julian Assange hian Ecuador a awm hmun khuar a duh a nih phawt chuan chenna tur in kan pe anga, chuta tang chuan duh ang thalin a hna thawh a chhunzawm thei tur a zalenna a nei bawk ang,” tiin thuchhuah a siam bawk. Julian Assange hian Award pawh a dawng tam hle tawh a, Economist Freedom of Expression Award (2008), Amnesty International UK Media Award (2009), Sam Adams Award (2010) etc te dawng tawhin  Time Magazine chuan 2010 Person of the year  ah an thlang a, Dec 24, 2010 khan French chanchinbu lar tak Le Monde pawhin Person of the year atan thlang lehin Utne Reader chanchinbu pawhin ‘25 Visionaries who are changing the world’ list-ah a telh bawk.

                    Julian Assange hi  Australian mi leh sa nimahse awm nghehna hmun mumal(permanent address) a nei lo a, Australia, Kenya, Tanzania, Uk, Iceland, Sweeden etc ah te reilo te te a awm kual thin niin a sawi. Assange hian Switzerland sawrkarah humhimna a dil a, mahse US sawrkar chuan Swiss sawrkar hnenah humhimna pe lo turin vaukhanna thu a chhakchhuak thung a ni. Hetianga address mumal a neih loh avang hian dan hremite chuan bail phalsak lo turin Court chu an ngen a, amaherawhchu Assange-a puitu Journalist pakhat Vaughan Smith chuan Smith’s Norfolk Mansion, Ellingham Hall address chu court ah thehlutin chuta awm tur chuan thu tih tluk a ni ta ani.

Tunkar Sermon

LALPA CHENNA                        Upa K. Lalbuanga

“Keini zawng Pathian nung biak in kan ni si”  II Kor. 6:16

Israel-hote khan an zinga Lalpa chenna turin maicham te, biak buk te, Pathian bawm te an buatsaih \hin a, a tawpah chuan Temple an lo puitlin thei ta hram a nih kha. A buaithlakin a kawng a thui duh hle ngei ang. Paula erawh chuan awlsam takin Pathian nung biak in, Lalpa chenna kan nih thu a lo sawi leh mai si, hetiang zawng hian i lo en zui zel teh ang.

            1. LUNG REM HRANG |HEUH :   Solomona Temple kha thir leh thing ri reng reng awm lo va sak a ni a, a hmanrua zawng zawng pawh hmun danga tan fel sa, ker fel sa leh chher fel sa veka sak zawh a ni. Buaithlakin hautak hle mahse he Temple hi an tan chuan a hluin a ropui ngawt ang le! Nimahsela hei hi kan tan entirna tur chauh a ni ang.

            Nun zia leh hmelhmang inang lo tak tak Kohhran-hote hi ri leh thawm reng reng awm lovin, Kalvari mistiri thiam berin hmanrua chi hrang hrang hmangin, ama chenna tura a buatsaihte chu kan ni. Lung chher rem tawh sa, lung hrang \heuh te rem taka chuktuahin Biak in thianghlim a siam \hin angin; mi zawng zawng rem thei nun te, mahni aia mi dang \ha zawka ruat thei nun te, rinawm leh fel taka awm \hin nun te hi ama kutchhuak tarlangtute chu an ni.

            2.   IN PENG TAWN |HEUH :   Taksa hi bung hrang tam tak ni mahse pawimawhna nei leh in peng tawn \heuh a ni a, chutiang bawkin keiniho pawh hi Krista taksa chu kan ni a, mi hrang hrang nimah ila in peng tawn \heuh kan ni. Hruaitu an awm chuan hruaite an awm a ngai a, thusawitu an awm chuan ngaithlatu an awm a ngai \hin. Mahse, hruaitu mitdelin mitvarte a hruai avanga khuarkhuruma la tla lut lo mai kan ni em? tih hi ngaihtuah thar a \ul ta! Pastor, Upa leh Rawngbawltute pawh ‘Berampu \ha nge kan nih, beram \ha pu?’  kan inenfiah deuh chu a \ul a ni.

            Kut hian beng dinhmun a luah a rem lo va, kephah pawh hi chal lama awm daih a rem hek lo. Lalpan a dahna hmun ni lo luah tlattute hi Kohhran tana sa har em em te chu an ni. Peng pakhat a nat chuan taksa pumpui chuan a hriatpui a, a tuarpui vek \hin. Lalpa mite natna hriatpui thei lo hruaitu, tawrhpui ngai lo rawngbawltu tam tak kan ram hian a nei tawh. Ke bul tan chuan kal a harsa a, mitdel phei chuan engmah a hmu thei lo. Pathian khawngaihna ropui tak avangin, Krista taksa tipuitling tura in peng tawn \heuh, hmangaihna hrui vuan za tlang, Lalpa chenna tura a kutchhuakte chu kan ni.

            3.  SERH HRAN :   Rawng bawl tura Pathian thisena tihthinghlim, ama tan chauh nung a, Lalpa chenna ni tura serh hran kan ni. Rawngbawl hna ngaihthahin, Chanchin |ha hi hril lo mah ila, chanchin chhia kan hril tho dawn. Chanchin |ha avanga tuar peih lo chuan, chanchin chhia avangin a tuar mek tho a ni. Thianghlim tura \an lak, keimahni inhriatna lam aiin van lam min hriatnaa thianghlim, serh hran kan nihna hi a pawimawh zawk fo. ‘Pathianin a tih thianghlim tawh chu nangin thiang lo ti suh’ tih Lalpa thu hi a la danglam lo ve.

            Samsona chu a lu-ah bakmehna reng reng rawih ni lo tura serh hran a ni a, Baptistu Johana pawh kha chhula a awm hma a\angin Uain leh zu reng reng in lo tura serh hran a ni bawk. Kohhran-Krista taksa chu a lo puitlin zel theihna hmanrua atan nang leh kei hi, chatuana nung reng Krista thisena serh hran, lung rem hrang \heuh, ama chenna tura rem khawm, in peng tawn vek, ama chenna tura Pathian nung Biak in chu kan ni si. Amen.